Hagnaður Íslandsbanka minnkar milli ára

Hagnaður Íslandsbanka á fyrsta ársfjórðungi ársins eftir skatta nam 4,6 milljörðum kr. Þetta er nokkuð lakari afkoma en á sama tímabili í fyrra þegar hagnaðurinn var 5,6 milljarðar kr. Munurinn á milli ára liggur að stærstum hluta í lægri vaxtatekjum og sveiflum í gengi íslensku krónunnar.

Þetta kemur fram í tilkynningu um uppgjörið. Þar segir að arðsemi eigin fjár eftir skatta lækkaði í 12,2% en hlutfallið var 17,7% í fyrra. Lækkun á arðsemi skýrist að mestu af hærra eigin fé, sem hefur hækkað um 18% á milli ára, eða frá 129 milljörðum kr. í 152. milljarða kr.

Eiginfjárhlutfall styrktist í 26,2% og lausafjárstaða Íslandsbanka er traust og vel yfir kröfum Fjármálaeftirlitsins og Seðlabankans.

"Afkoma af grunnrekstri á fyrsta fjórðungi var í takt við áætlanir. Við sjáum að þau hagræðingarverkefni sem við höfum verið að vinna að eru byrjuð að skila sér og kostnaður lækkar um 3% milli tímabila. Um leið hafa þóknanatekjur aukist um 17% frá fyrra ári sem má meðal annars rekja til aukinna umsvifa á íslenskum verðbréfamarkaði. Þar hefur Íslandsbanki verið sannkallað hreyfiafl en bankinn er nú stærsti útgefandi sértryggðra skuldabréfa á landinu og gaf einnig út víxla á fjórðungnum, fyrst íslenskra fjármálafyrirtækja frá haustinu 2008,“ segir Birna Einarsdóttir, bankastjóri Íslandsbanka.

„Íslandsbanki veitti um 20 þúsund skilvísum viðskiptavinum vaxtaendurgreiðslu í febrúar s.l., eða samtals 2.5 milljarða kr. sem voru lagðar inn á nýjan sparnaðarreikning, Vaxtaþrep 30 dagar. Markmið með endurgreiðslunni var að hvetja til sparnaðar og ánægjulegt frá því að segja að tæpur helmingur endurgreiðslunnar er enn á sparnaðarreikningi hjá bankanum.“