Mun fremur Íslendingar sem loka

Guðni Einarsson er bóndi í Þórisholti. Hann hefur unnið á vegum Lamprechts við trjáplöntun og umsjón jarðanna. Hann segir að það sé enginn munur á því að útlendingar kaupi jarðir eða Íslendingar, ef ætlunin sé að gera eitthvað og skapa atvinnu. Guðni segir að þegar fréttist af kaupunum hafi nokkrir verið ósáttir.

„Sumir vilja halda þessu í byggð og það er svo sem allt í lagi með það. Þegar kynslóðaskipti verða er ekki sjálfgefið að börnin vilji taka við búskap. Hvað eiga menn þá að gera?“

Lamprecht keypti jarðirnar árið 2003, en ábúendur höfðu tíu ára ábúðarrétt. Tómas Pálsson, bóndi á Litlu-Heiði, brá búi síðastliðið haust og enn eru hross í eigu fyrrum eigenda á jörðinni. Næsta sumar verður fyrsta sumarið þar sem Lamprecht verður einn í dalnum. Guðni óttast ekki að það þýði að svæðinu verði lokað.

„Eins og þið sjáið gátuð þið keyrt hingað heim í hlað, það er ekkert hlið. Þetta verðum við kannski frekar vör við ef Íslendingar kaupa, að þeir loki. Í nýju aðalskipulagi gerði hann ekki athugasemdir við að skipulagðar væru gönguleiðir um hans land. Þetta er nú öll lokunin. Hér er náttúrulega gömul þjóðleið og hann kemur aldrei til með að loka þessu.

Hins vegar búum við við þann veruleika að ferðamannatraffík er að aukast alveg gríðarlega og við þurfum náttúrulega að hafa hemil á því. Við viljum náttúrulega ekki að ferðamenn fari hér um allt og óhindrað, það þarf að hafa stjórn á því líka.“

Allt opið

Einu girðingarnar sem settar hafa verið upp á svæðinu eftir að Lamprecht eignaðist það eru til að vernda skógrækt fyrir ágangi búfjár. Guðni segir að líklega verði meira sett upp af slíkum girðingum, en Lamprecht hefur uppi áform um að fylla í skurði og endurheimta votlendi.

„Hann þarf náttúrulega að girða af ef hann ætlar að vernda þetta. Við girtum skógræktina af, en að öðru leyti hafa menn beitarrétt og geta beitt á heiðarlöndin. En hugsanlega kemur hann til með að verja Heiðardalinn sjálfan fyrir búfé.“

Lamprecht ræktar lax í Vatnsána og sjóbirtingur gengur upp í hana. Hann selur veiðileyfi í ána og vatnið, nokkuð sem fyrri eigendur gerðu einnig. Þá hefur hann haldið áfram uppgræðslustarfi þeirra.

„Við höfum á hverju ári dreift út áburði hérna til að halda áfram uppgræðslunni. Sá sem bjó hér fyrir, Tómas Pálsson, var mikið í uppgræðslu. Lamprecht hefur svo haldið því áfram. Hann hefur allavega hug á að vernda landið og gera það náttúrulegt. Það er hans draumur.“

Lamprecht-reglugerð

Líkt og áður hefur verið komið inn á í þessum greinaflokki er Ögmundur Jónasson innanríkisráðherra með reglugerð í smíðum til að takmarka eignarhald útlendinga á íslenskum jörðum. Í samtali við Fréttablaðið í janúar útskýrði hann að það væru ekki síst kaup Lamprechts sem væru kveikjan að vinnunni.

„Hugsunin er ekki sú að girða fyrir allar fjárfestingar á Íslandi eins og margir hafa verið að gefa í skyn. Ég er að beina sjónum mínum fyrst og fremst að eignarlandi,“ sagði Ögmundur í janúar.

Í fréttinni þá segir:

„Það eru brögð að því að auðkýfingar séu að safna hér jörðum án þess að hafa nokkurn tilgang með því að sinni annan en að safna eignarlandi á Íslandi,“ segir Ögmundur og nefnir sérstaklega landakaup Svisslendingsins Rudolfs Lamprecht í Mýrdal.

„Ég hygg að þetta sé líka að gerast annars staðar án þess að ég vilji á þessu stigi fara nánar út í það,“ segir Ögmundur.