Afturkallar ný lög um náttúruvernd

Sigurður Ingi Jóhannsson, umhverfis og auðlindaráðherra, hefur ákveðið að afturkalla lög um náttúruvernd sem voru samþykkt á Alþingi rétt fyrir þinglok í vor. Gert var ráð fyrir að lögin tækju gildi 1. apríl á næsta ári.

Á vef Umhverfisráðuneytisins segir að Sigurður Ingi hafi ákveðið að leggja fram frumvarp á Alþingi þegar þing kemur saman í haust um að fella nýju lögin úr gildi.

Verði frumvarpið samþykkt verður í raun engin breyting, heldur munu núgildandi nátturuverndarlög halda áfram gildi sínu.

„Hyggst ráðherra jafnframt fela umhverfis- og auðlindaráðuneytinu að hefja endurskoðun á náttúruverndarlögunum með það að markmiði að styrkja stöðu náttúruverndar og ná um þau sátt. Gert er ráð fyrir að nýtt frumvarp til náttúruverndarlaga verði lagt fram til umfjöllunar Alþingis, þegar framangreindri vinnu er lokið. Við þá vinnu verður m.a. stuðst við þær fjöldamörgu athugasemdir sem liggja fyrir frá vinnunni við frumvarpið sl. vetur, auk þess sem haft verður samráð við hagsmunaaðila,“ segir á heimasíðunni.

Þá segir einnig að ljós sé að huga þarf nánar að veigamiklum atriðum vegna vinnu við gerð nýs frumvarps til laga um náttúruvernd.

Nánar verður fjallað um málið í Fréttablaðinu á morgun.