Getgátur um mútugreiðslu á þriðja degi réttarhalda

Halldór Bjarkar Lúðvígsson, fyrrverandi viðskiptastjóri á útlánasviði Kaupþings, sagðist fyrir Héraðsdómi Reykjavíkur í morgun hafa talið að fimmtíu milljón dala lán sem Al Thani fékk í gegnum Kaupþing í Lúxemburg hafi verið eins konar mútugreiðsla fyrir að ljá nafn sitt við kaup á 5,01% hlut í Kaupþingi.

Þriðji dagurinn í Al Thani-réttarhöldunum fór fram í dag. Halldór Bjarkar er eitt af lykilvitnum saksóknara.

„Það var engin ábyrgð á fimmtíu milljónum dollara. Hann átti að fá peninginn til baka. Ég held að það hafi aldrei komið króna frá sjeiknum,“ sagði Halldór Bjarkar í hljóðrituðu símtali við Lilju Steinþórsdóttur, fyrrverandi innri endurskoðanda Kaupþings, sem saksóknari í málinu spilaði.

Varðandi það að Al Thani hafi átt að fá hagnaðinn greiddan fyrirfram, sem saksókarinn telur að 50 milljón dala greiðslan hafi verið, sagði Halldór Bjarkar: „Það má kalla það mútur, þegar ég horfði á strúktúrinn eftir á. Þetta voru mínar getgátur en mér þótti sérkennilegt að hann fengi greitt.“ Saksóknari spurði hvort reynt hafi verið að fela þátt Ólafs Ólafssonar í málinu og sagðist Halldór telja að svo hefði verið. „Þetta voru Maggi [Magnús Guðmundsson, fyrrverandi forstjóri Kaupþings í Lúxemborg] og Hreiðar [Guðmundsson, fyrrverandi forstjóri Kaupþings] sem voru að semja allt saman.“

Saksóknari spurði Halldór Bjarkar hver hefði samþykkt að Al Thani fengi lánið. Svaraði hann því til að Hreiðar Már hefði gert það. „Hreiðar Már gaf mér þau fyrirmæli að greiða þetta út strax. Hann sagði að ég þyrfti ekki að hafa áhyggjur af samþykktum.“ Hreiðar Már er ósammála því að þetta samtal hafi átt sér stað og verjandi hans benti á að engin gögn væru til um samskipti Halldórs og Hreiðars Más.

Verjandinn reyndi að rýra trúverðugleika Halldórs með því að sýna frétt frá breska blaðinu The Guardian sem birtist þegar Halldór starfaði hjá slitastjórn Kaupþings. Í greininni stóð að starf hans hjá stjórninni væri vandræðaleg vegna aðildar hans að Al Thani-málinu. Eftir rannsókn sérstaks saksóknara var Halldór ekki lengur í réttarstöðu sakbornings. Hann er núna framkvæmdastjóri Arion banka. Verjandi spurði hvort hann hefði fengið það starf ef hann hefði haft réttarstöðu sakbornings. „Mér þykir það ólíklegt,“ svaraði Halldór.

- Fyrsta vitnið í morgun var Lara E. Schweiger sem starfaði sem lögmaður í Lúxemborg. Saksóknari spurði hana á hvaða forsendum 50 milljóna dala lánið sem Al Thani fékk hafði verið veitt. „Ég vissi ekki fyrst hverjar ástæður lánveitingarinnar voru. Svo var mér sagt að grundvöllurinn fyrir láninu væri fyrirframgreiðsla hagnaðar lánshæfistengds skuldabréfs,“ sagði hún. Spurð hvort hún hafi verið undrandi á þessu játaði hún því. „Vegna þess að okkur virtist ekkert vit vera í þessu.“

- Vörubílstjórinn Sturla Jónsson, sem var áberandi í fjölmiðlum í kringum hrunið, gekk inn í réttarsalinn skömmu áður en skýrslutökunni yfir Halldóri Bjarkari lauk um hádegisbilið. Hann fékk sér sæti á fremsta bekk og hlýddi með athygli á það sem fram fór.

- Gianni De Bortoli, fyrrverandi starfsmaður á lagasviði hjá Kaupþingi í Lúxemborg, bar vitni í gegnum síma. Dómtúlkurinn Torfi Tulinius sá til þess að allar upplýsingar kæmust til skila á milli Bortoli annars vegar og hins vegar dómara, saksóknara og verjenda.