Sprotar vongóðir um fjármögnun

Tíu sprotafyrirtæki kynntu hugmyndir sínar á fjárfestadegi Startup Reykjavík í Arion banka í gærmorgun.

Ólafur Ragnar Grímsson, forseti Íslands, fjallaði í opnunarávarpi sínu um það hvernig ný tækni hafi jafnað tækifæri til nýsköpunar á heimsvísu.

„Nú gilda engar afsakanir lengur. Sköpunarkrafturinn sem okkur hefur verið gefinn er á nýjum leikvelli,“ sagði hann. Núna væri yngsta kynslóðin á heimavelli í nýsköpun og til hennar væri vert að horfa.

Gróska innan tækniframfara hafi raskað hefðbundnum valdahlutföllum og ungt fólk fengið trú og fullvissu um að það geti verið þátttakendur í hugmyndasköpun og nýbreytni á heimsvísu.

Aðalfyrirlesari á fjárfestadeginum var Jonathan Ortmans, forseti Global Entrepreneurship Week.

Hann talaði einnig um breytta tíma þegar úr grasi vaxi kynslóðir sem deili gildum þvert á landamæri og vinni saman að nýsköpun um heim allan. Hann benti á að öll ný störf sem orðið hafi til í Bandaríkjunum síðustu ár hafi komið frá fyrirtækjum fimm ára og yngri.

Þjóðir heims átti sig því á því í auknum mæli hversu miklu skipti fyrir framþróun og hagvöxt að styðja við sprotafyrirtæki.

Startup Reykjavik er samstarfsverkefni Arion banka, Klaks og Innovit. Valin eru tíu viðskiptateymi sem meðal annars fá tvær milljónir í hlutafé frá Arion banka gegn 6 prósenta eignarhlut í fyrirtækinu.

Þá fá þau tíu vikna þjálfun, aðsetur í húsnæði við Borgartún í Reykjavík, aðgang að tengslaneti Global Accelerator Network og kynna svo að lokum verkefni sín fyrir fjárfestum.

Sprotafyrirtækin sem kynntu verkefni sín í gær:

SAReye kynnti aðgerðar og krísustjórnunarkerfi fyrir viðbragðsaðila og stærri fyrirtæki.

Activity Stream greinir gagnlegar upplýsingar úr viðskiptahugbúnaði fyrirtækja.

Snjohus Software hannar hugbúnað fyrir snallsíma, þar á meðal einkaþjálfaraappið Vfit.

Herberia þróar og skráir jurtalyf á Evrópumarkað.

Þoran Distillery hyggur á framleiðslu maltviskís á Íslandi.

Silverberg býr til mælingarbúnað fyrir líkamsræktarstöðvar og hugbúnað fyrir notendur.

Golf Pro Assistant er vefhugbúnaður fyrir golfkennara og nemendur.

SeeMee ef vefviðmót fyrir atvinnuumsóknir með myndskeiðum og öðrum gögnum.

Y-Z hannar og selur kvenfatnað sem hægt er að breyta eftir aðstæðum.

Zalibuna hyggur á sleðaferðir niður Kambana með veitinga- og minjagripasölu.

Frekari upplýsingar um verkefnin er að finna á vef Startup Reykjavik.