Upptökurnar gengu vel

Alex James úr Blur segir að upptökutímar hljómsveitarinnar í Hong Kong hafi gengið mjög vel. Söngvarinn Damon Albarn sagði á tónleikum í Hong Kong í síðasta mánuði að hljómsveitin væri á leiðinni í hljóðver á nýjan leik.



„Við verðum í viku í Hong Kong og okkur datt í hug að það væri gaman að prófa að taka upp nýja plötu.“



James hefur núna bætt þessu um upptökurnar við í samtali við Bang Showbiz: „Þetta var algjör snilld. Við djömmuðum bara, sem var mjög gott. Vonandi kemur eitthvað út úr þessu.“

Tíu ár eru liðin frá útkomu síðustu plötu Blur, Think Tank.