Ryðja brautina fyrir nýja kauphallarsjóði

Sex nýjar skuldabréfavísitölur sem Kauphöll Íslands (Nasdaq OMX Iceland) kynnir í dag eru til þess fallnar að auðvelda smærri fjárfestum aðkomu að skuldabréfamarkaði, að sögn Magnúsar Harðarsonar aðstoðarforstjóra Kauphallarinnar.

„Þetta eru heildarvísitölur sem taka markaðinn með markflokkana, þessi veltumestu ríkis og íbúðabréf, og mæla verðbreytingar á þeim,“ segir Magnús. Mikið sé upp úr því lagt að vísitölurnar séu „sjóðavænar“, þannig að auðvelt sé fyrir verðbréfasjóði að fylgja þeim.

„Við setjum til dæmis á þær vægisþak, þannig að ekkert bréf má vera með meira en 30 prósenta vægi í vísitölunum. Þá eru þær endurskoðaðar mánaðarlega og þannig upp settar að þeir sem fylgja vísitölunni eiga ekki að þurfa að eiga nein viðskipti milli endurskoðana.“

Ástæðuna fyrir því vísitölurnar eru stofnaðar nú segir Magnús vera að að í burðarliðnum séu kauphallarsjóðir sem muni fylgja vísitölunum.

„Þá eru viðskipti með þessa sjóði eins hver önnur verðbréf í Kauphöllinni og við eigum von á því að þeir líti dagsins ljós snemma hausts. Þannig að segma má að þessar vísitölur ryðji brautina fyrir þá og auðveldi leiðina fyrir ýmsa inn á skuldabréfamarkaðinn, ekki síst smærri fjárfesta.“

Nýju skuldabréfavísitölurnar sex

NOMXI viðmiðunarvísitölur Kauphallarinnar sem settar eru á laggirnar í dag eru þrjár talsins, í tveimur flokkum hver, með og án vægisþaks: 

• Aðalvísitala skuldabréfa (NOMXIBB)

• Óverðtryggð skuldabréfavísitala Kauphallarinnar (NOMXINOM)

• Verðtryggð skuldabréfavísitala Kauphallarinnar (NOMXIREAL)



Vísitölunum er öllum gefið grunngildið 1000 þann 28. desember 2012.