Næsta plata ólík Hagléli

Örn Elías Guðmundsson, Mugison, býst við því að byrja á næstu sólóplötu sinni snemma á næsta ári og segir að hún verði á ensku. Aðspurður efast hann um að hún verði í svipuðum dúr og hin gríðarvinsæla Haglél, sem sló öll sölumet árið 2011. „Maður er svo „skitsófrenískur“ þegar kemur að músíkinni. Þetta hafa allt verið stór hopp hjá mér, finnst mér. Ég gaf út krúttplötu [Mugimama is this Monkeymusic?], og rokkplötu [Mugiboogie] og svo „adult contemporary“-plötu [Haglél]. Ég veit ekki hvað gerist næst. Það fer eftir því í hvaða fílingi ég er þegar ég fer á lokasprettinn,“ segir Mugison, sem býst við að hljóðfærið hans mirstrument komi við sögu á plötunni. Hann vill einnig stofna hljómsveit með átta bassaleikurum og þremur trommurum. „Með því bandi langar mig að búa til mesta dauðarokk sem hefur verið búið til. Sú hugmynd er að gerjast hjá mér.“ Mugison er einnig að vinna í tveimur samstarfsverkefnum sem bæði verða á íslensku. „Vonandi klárast það í ár, þannig að það gætu verið tvær plötur með mér á íslensku á þessu ári. En kannski verður engin plata ef ég klúðra þessu.“