Partístemning á Faktorý

„Okkur finnst þetta gott málefni og vildum endilega taka þátt. Við reynum að leggja okkar af mörkum þegar við höfum tíma og getu til. Manni finnst stundum eins og það sé ekki hægt að gera neitt til að hjálpa, en svo er hægt að gera fullt,“ segir Lóa Hlín Hjálmtýsdóttir, söngkona hljómsveitarinnar FM Belfast, sem kemur fram á styrktartónleikum fyrir Regnbogabörn í kvöld.

Fram koma sveitirnar Kjurr, Vök, Prins Póló, FM Belfast og Úlfur Úlfur.

Lóa Hlín kveðst vel stemmd fyrir tónleikana en á enn eftir að finna pössun fyrir son sinn og Árna Rúnars Hlöðverssonar, sem einnig er í hljómsveitinni. „Við munum að öllum líkindum spila nýtt efni í bland við gamalt, það er vaninn, og reyna að byggja upp partístemningu. Svo á ég eftir að finna pössun.“

Hljómsveitin kom síðast fram á tónleikum í Istanbúl í Tyrklandi og var það í þriðja sinn sem FM Belfast kemur fram í borginni. „Þetta er exótískasta borg sem ég hef spilað í. Við höfum spilað þrisvar sinnum á sama klúbbnum í Istanbúl og það er alltaf jafn gaman.“

Ferðin til Tyrklands gekk þó ekki vandræðalaust fyrir sig því einn meðlimur sveitarinnar gleymdi vegabréfi sínu heima. „Allt hefði farið í klúður ef mágkona mín hefði ekki verið með, hún hugsar alltaf skýrt í krísum og þess vegna reddaðist þetta fyrir horn með hjálp íslenska sendiráðsins í Danmörku sem reddaði okkur neyðarvegabréfi.“

Lóa og Árni höfðu átta mánaða gamlan son sinn með sér til Tyrklands og vakti sá stutti mikla athygli meðal heimamanna. „Honum leið örugglega eins og litlum prins. Fólk var alltaf að kyssa hann og kjassa og veita honum athygli.“

Tónleikarnir á Faktorý hefjast klukkan 20.30 og er miðaverð 1.500 krónur.