"Ég er síðastur út"

„Ég er síðastur út,“ sagði Pólverji á miðjum aldri sem í gær flutti úr Vesturvör 27 eftir að öllum var gert að yfirgefa húsið.

Vesturvör 27 í Kópavogi er atvinnuhúsnæði. Þar hefur engu að síður um árabil búið fjöldi fólks sem langflest er innflytjendur, fyrst og fremst frá Póllandi og Litháen. Í byrjun mars var sagt frá baráttu fólksins fyrir því að fá að vera áfram í húsinu eða fá aðstoð frá Kópavogsbæ til að fá húsaskjól annars staðar.

„Fólkið útvegaði sér á endanum sjálft staði til að fara á. Sjálfur er ég búinn að leita mikið en ekki gengið vel. Ég fer á gistihús uppi í Grafarvogi til að byrja með. Kannski tekst mér að kaupa íbúð,“ sagði Pólverjinn, sem ekki lét nafns getið en kvaðst starfa hjá Pósthúsinu, við útburð Fréttablaðsins.

Bæði vatn og rafmagn hafði verið tekið af Vesturvör 27 fyrir nokkru. Innandyra var aðvörun frá slökkviliðsstjóra um að öryggiskröfur væru ekki uppfylltar og að allir þyrftu að vera farnir úr húsinu fyrir 18. apríl, það er í dag.

Pólski viðmælandinn okkar virtist taka þróun sinna húsnæðismála eins og hverju öðru hundsbiti. „Þetta er bara eðlilegt,“ svaraði hann spurður um hvaða augum hann liti að þurfa að yfirgefa vistarveruna sem hann hefði haft á leigu.

Eins komið hefur fram í Fréttablaðinu er það félagið Drómi sem á Vesturvör 27. Komið hefur fram í yfirlýsingu frá Dróma að félagið sjálft hafi ekki verið leigusali fólksins heldur þriðji aðili. Drómi hafi hins vegar ítrekað krafist þess af leigusalanum að sjá til þess að húsið yrði rýmt vegna þess að það væri í afar bágu ástandi og óhæft til útleigu, meðal annars vegna skorts á flóttaleiðum við eldsvoða. Til stendur að rífa húsið.