Á hærri launum eftir ákúrur um greiðslur

Launagreiðslur til forstöðumanns tölvudeildar Þjóðskrár Íslands (ÞÍ) hækkuðu eftir gagnrýni Ríkisendurskoðunar árið 2010 um að greiðslur til einkahlutafélags í eigu mannsins væru óeðlilegar.

Innanríkisráðuneytið hyggst kalla forstjóra ÞÍ á teppið vegna launakjara forstöðumannsins.

Forsaga málsins er að árin 2009 og 2010 beindist athygli Ríkisendurskoðunar að verktakagreiðslum Fasteignaskrár Íslands (FÍ nú ÞÍ) til Tölvuskjölunar ehf. Félagið reyndist vera í eigu forstöðumanns tölvudeildar FÍ. Hann hafði fasta vinnuaðstöðu á stofnuninni og fastan vinnutíma. Að jafnaði námu árlegar verktakagreiðslur FÍ til Tölvuskjölunar 11 til 12 milljónum króna á ári. Ríkisendurskoðun taldi fyrirkomulag þessara verktakagreiðslna óeðlilegt, enda fjárhagsleg ábyrgð forstöðumannsins engin og starfsemin því í eðli sínu „gerviverktaka“, þ.e. greiddar voru út verktakagreiðslur en ekki laun þótt forstöðumaðurinn fengi endurgjaldslausa vinnuaðstöðu og öll nauðsynleg aðföng, verkfæri, tæki og aðstoð frá launuðum starfsmönnum ÞÍ.

Þjóðskrá brást þegar við ábendingum Ríkisendurskoðunar og sagði upp verksamningi við Tölvuskjölun. Ekki urðu neinar breytingar á starfsmannahaldi stofnunarinnar við þetta þar sem eigandi Tölvuskjölunar ehf. sótti um starfið og fékk það.

Í nýútkominni skýrslu Ríkisendurskoðunar kemur fram að við þessa breytingu lækkuðu ekki launagreiðslur til mannsins. „Ef eitthvað er hækkuðu þær þótt þess hefði mátt vænta að þær lækkuðu þegar stofnunin hóf að bera ýmsan launatengdan kostnað sem verktakar bera jafnan sjálfir,“ segir í skýrslunni. Almennt er talið að slík gjöld nemi um 24% af heildargreiðslum launamanna.

Sveinn Arason ríkisendurskoðandi vill litlu bæta við skýrsluna en játar að í henni felist hvöss gagnrýni. „Þetta eru spurningar sem koma væntanlega upp í samtali forstjórans við ráðuneytið,“ segir Sveinn, spurður hvort eðlilegt sé að forstöðumaðurinn sitji enn í starfi og hvort gera ætti kröfu um endurgreiðslu af hluta þeirrar upphæðar sem runnið hefur til mannsins frá 2002. Þar vísar Sveinn til viðbragða innanríkisráðuneytisins við skýrslunni þar sem segir að ráðuneytið „mun boða forstjóra ÞÍ á sinn fund […] þar sem farið verður yfir launasetningu forstöðumanns tölvudeildar stofnunarinnar“.