Biskup fundar með Sigríði vegna kvörtunarbréfs

Agnes M. Sigurðardóttir, biskup íslands, hefur boðað Sigríði Guðmarsdóttur, sóknarprest í Grafarholti, á sinn fund vegna kvartana Gunnars Þorsteinssonar kenndum við Krossinn.

„Hún ætlar að hitta okkur á morgun en við viljum ekki tjá okkur frekar um málið fyrr en efni bréfsins hefur verið kynnt fyrir Sigríði,“ segir Árni Svanur Daníelsson, verkefnisstjóri á Biskupsstofu.

Forsaga málsins er sú að Sigríður skrifaði um stefnu Gunnars á hendur stuðningskonum þeirra sem ásökuðu hann um kynferðisbrot. Sagðist hún styðja Krosskonurnar og trúa sögu þeirra.

Í kjölfarið sendi lögmaður Gunnars kvörtunarbréf til biskups þar sem Sigríður er sögð taka „einarða afstöðu í málinu“ með ummælum sínum og telur Gunnar að þau feli í sér grófa árás á æru sína og brjóti í bága við almenn hegningarlög.