Sakamál gegn Landsbankanum í Lúxemborg

Hópur breskra lífeyrisþega er að reyna að höfða sakamál á Spáni gegn forsvarsmönnum Landsbankans í Lúxemborg vegna fjársvika sem þeir telja sig hafa orðið fyrir í viðskiptum við bankann.

Þetta kemur fram í blaðinu Round Town News sem gefið er út af Bretum búsettum á Spáni.

Í því segir að hundruð lífeyrisþega, sem búsettir eru á Spáni, í Frakklandi og Portúgal, flestir breskir, hafi verið skilir eftir í fjárhagslegum kröggum eftir hrun Landsbankans.

Fjölmargir lífeyrisþegar í þessari stöðu hafa stofnað hópinn „Landsbanki Victims Action Group“ og hafa nú höfðað sakamál í bænum San Roque á Spáni, en yfir 60 manns úr hópnum hafa verið boðaðir í skýrslutöku við undirbúning málshöfðunarinnar. Dómstóll í borginni Dénia hefur nú þegar hafnað beiðni hópsins í sambærilegu máli, þar sem um sé að ræða mál af einkaréttarlegum toga frekar en sakamál.

Talsmaður hópsins, Mike McInnes, sagði í samtali við blaðið að málshöfðunin væri frábær frétt fyrir lífeyrisþegana, þar sem eftir fimm ára baráttu séu hjól réttlætisins loksins farin að snúast.

„Við vonum að þeir sem stóðu fyrir þessum svikum munu núna þurfi að bera ábyrgð á gjörðum sínum,“ sagði McInnes. Hann bætti við að einhver fórnarlamba hinna meintu fjársvika hefðu látist vitandi af því að makar þeirra þyrftu að takast á við að glata húsnæði sínu til slitastjórnar Landsbankans.

Í fyrra voru yfir 120 meðlimir hópsins búsettir á Costa del Sol og Costa Blanca á Spáni og yfir 16 meðlimir hafa látist síðan hópurinn var stofnaður.

Páll Benediktsson, upplýsingafulltrúi slitastjórnar Landsbankans á Íslandi, segir þetta mál ekki snerta slitastjórnina með neinum hætti.

„Landsbankinn í Lúxemborg var sjálfstætt félag, dótturfélag Landsbankans, og heyrir ekki undir þrotabú gamla Landsbankans. Uppgjör á kröfum milli bankans og þess í Lúxemborg hefur farið fram og við höfum engin afskipti af þessum málum,“ sagði Páll í samtali við Fréttablaðið.