Seljavallalaug ein af bestu sundlaugum veraldar

Lesendur The Guardian hafa valið Seljavallalaug sem eina af tíu bestu sundlaugum veraldar. Fyrir þá sem ekki vita er Seljavallalaug jarðhitalaug sem staðsett er í Laugárgili undir Eyjafjöllum.

Í greininni sem birtist í dag kemur fram að laugin sé sú elsta á Íslandi, en hún var hlaðin árið 1923, og var sú stærsta til ársins 1936. Tekið er fram að umhverfi laugarinnar sé ævintýralegt og vatnið hlýtt og notalegt. Þá er sérstaklega minnst á að jarðhitalaugin hafi fyllst af ösku þegar Eyjafjallajökull gaus árið 2010.

Ólympíulauginn í Sidney trónir á toppi listans, en meðal annarra lauga á listanum eru Badeschiff „fljótandi laugin“ í Berlín og sundlaugin Sea Point Pavillion við ströndina í Höfðaborg í Afríku.

Hægt er að skoða listann í heild sinni á vef The Guardian.