Gestur segir réttarfarssekt "óskiljanlega“ - hafa báðir áfrýjað

Lögmennirnir Ragnar Hall og Gestur Jónsson sem dæmdir voru til réttarfarssektar fyrir að segja sig frá málinu á fyrri stigum og fyrir að misbjóða virðingu Héraðsdóms Reykjavíkur hafa þegar áfrýjað þeirri refsingu sem þeir fengu í dómnum til Hæstaréttar.

Með dómi í Al-Thani málinu voru þeir Gestur Jónsson og Ragnar H. Hall til að greiða eina milljón króna í réttarfarssekt fyrir að segja sig frá verjendastörfum í málinu á fyrri stigum þess að tilefnislausu.

Um þetta segir í dómnum: „Ákvörðun þeirra um að segja sig frá vörn ákærðu olli óþörfum drætti á málinu og gekk þannig gegn hagsmunum ákærðu. Þá var sú háttsemi verjendanna að mæta ekki á dómþing við aðalmeðferð máls, þegar dómari hafði synjað þeim um að vera leystir undan verjendastörfum, til þess fallin að misbjóða virðingu dómsins.“

Þegar Gestur og Ragnar tóku hina umdeildu ákvörðun mættu þeir í viðtal í Íslandi í dag sem má sjá hér.

Við hittum Gest Jónsson á skrifstofu hans í dag. Sjá má viðtalið í heild sinni hér.

Gestur segir þetta ung orð í garð sín og Ragnars í dómsniðurstöðunni. „Já, þetta eru mjög alvarleg orð en mér eru þau óskiljanleg. Ég var hættur sem verjandi og það sama gildir um Ragnar Hall á þeim tíma sem við létum af störfum þá var Pétur Guðgeirsson dómari í málinu og ég kom aldrei í þinghald þar sem þessir dómarar voru í forsæti,“ segir Gestur.

„Ég held að það standist enga skoðun að það sé hægt að gera mönnum refsingu eins og þetta klárlega er án þess að viðkomandi einstaklingur sem fyrir refsingunni verður komi fyrir þann sem dæmir í málinu og geri honum grein fyrir sínum sjónarmiðum,“ segir Gestur en segist ekki vera neinn sérfræðingur í réttarfarssektum enda hafi hann aldrei verið í þinghaldi þar sem slíkum sektum var beitt. Málið sé óvenjulegt.

Ragnar Hall er einnig mjög óhress með ákvörðun um réttarfarssekt og brýningu sem þeir fá í dómsniðurstöðunni. Hann kallar þetta „vitleysisgang“ í viðtali við Morgunblaðið í dag.

Í skriflegu svari til fréttastofu Stöðvar 2 og Vísis gagnrýnir Ragnar niðurstöðuna. „Í röksemdum dómsins kemur fram að tími fyrir aðalmeðferð hafi verið ákveðinn löngu áður og að við höfum samþykkt það.  Þetta síðastnefnda er rangt. Ég hafði strax samband við dómarann og lét vita að ég teldi að ótímabært væri að ákveða tíma fyrir aðalmeðferðina löngu áður en gagnaöflun væri lokið í málinu. Við vorum aldrei í verjendahlutverkum í þessu máli eftir að þeir dómarar tóku við meðferð þess sem kváðu upp þennan dóm.  Sá dómari sem hafði málið til meðferðar þegar við eigum að hafa sýnt dóminum vanvirðingu taldi ekki ástæðu til beitingar réttarfarssektar og kvað þess vegna ekki upp úrskurð þar að lútandi.  Okkur var aldrei gert viðvart um að til álita gæti komið að beita okkur réttarfarssekt.  Við vorum heldur ekki boðaðir til að hlýða á uppsögu dómsins,“ segir Ragnar en þeir mættu samt báðir við dómsuppsöguna í gær.