Vill að ESB standi við IPA samninga

Sigmundur Davíð Gunnlaugsson, forsætisráðherra, segir eðlilegt að Evrópusambandið standi við þá IPA styrki sem þegar var búið að semja um og segist hafa komið þeim skilaboðum á framfæri til forystumanna ESB fyrr á þessu ári.

Evrópusambandið ákvað í byrjun desembermánaðar að draga til baka alla IPA-styrki á Íslandi en styrkirnir eru sérstaklega ætlaðir þjóðum sem stefna á inngöngu í sambandið. Ákvörðun ESB um að draga styrkina til baka kom íslenskum stjórnvöldum á óvart.

Birgir Ármannsson, þingmaður Sjálfstæðisflokks og formaður utanríkismálanefndar Alþingis sagði á Sprengisandi á Bylgjunni í gær að íslensk stjórnvöld væru nú að skoða réttarstöðu þeirra stofnana sem hafa fengið loforð um styrki um mögulegar bætur frá ESB vegna samningsrofs.

Árni Páll Árnason, formaður Samfylkingarinnar, tók málið upp á Alþingi í dag og spurði forsætisráðherra hvort slíkt væri í skoðun.

Sigmundur Davíð sagðist hafa komið þeim skilaboðum til forystumanna ESB fyrr á þessu ári að hann teldi rétt að klára þau IPA verkefni sem þegar væru búið að semja um. Hins vegar væri skiljanlegt að ekki væri stofnað til nýrra verkefna á meðan aðildarviðræður væru í biðstöðu.

Sigmundur telur eðlilegt að kanna réttarstöðu þeirra stofnana sem áttu að fá IPA styrki í samræmi við fyrirliggjandi samkomulag. Þessar stofnanir væru búnar að gera ýmsar ráðstafanir vegna þessa.

„Þannig að þegar ekki er staðið við að afhenda þá styrki sem höfðu verið gefin fyrirheit um og þessar stofnanir höfðu réttmæta ástæðu til að ætla að myndu skila sér þá taldi formaður utanríkismálanefndar og fulltrúar þar og utanríkisráðherra hefur lýst sömu skoðun að það væri eðlilegt að menn skoðuðu réttarstöðu þessara stofnana sem höfðu gert ráðstafanir í trausti þess að búið væri að semja um að þær fengju þessa tilteknu styrki. Útá það gengur þetta en ekki að halda áfram að bæta við nýjum IPA styrkjum,“ sagði Sigmundur.