Innlent

Kemur ekki til greina að loka neyðarbraut suðvesturlands

Kristján Már Unnarsson skrifar
Áform um að loka minnstu flugbraut Reykjavíkurflugvallar mæta harðri andstöðu. Friðrik Pálsson, sem fór fyrir undirskriftasöfnun til stuðnings vellinum, segir ekki koma til greina að suðvesturhorn landsins verði skilið eftir án neyðarflugbrautar í hvössum suðvestan- og norðaustanáttum.

Þremur vikum eftir að vopnahlé í flugvallardeilunni var handsalað virðist friðurinn úti. Borgaryfirvöld virðast staðráðin í að loka sem fyrst minnstu flugbrautinni, norðaustur-suðvesturbrautinni, til að koma þar fyrir þrjúþúsund manna byggð. Forsvarsmenn Hjartans í Vatnsmýri, sem söfnuðu sjötíu þúsund undirskriftum í haust til stuðnings vellinum, segja að ætíð hafi verið gengið út frá því að þessari braut yrði ekki lokað nema braut með samsvarandi stefnu í Keflavík yrði opnuð að nýju. 

„Það er ekkert í myndinni að þessari braut verði lokað fyrr en hin brautin hefur verið opnuð,” segir Friðrik í fréttum Stöðvar 2. „Þetta er neyðarbraut og það kemur bara ekki til álita að skilja suðvesturhornið eftir í þeirri stöðu að það sé ekki hægt að lenda í þessum hvössu suðvestanvindum sem stundum verða hér, - og norðaustan.”

Hann minnir á að búið sé að skipa nefnd undir forystu Rögnu Árnadóttur til að skoða til hlýtar alla valkosti í flugvallarmálinu. Það starf eigi ekki að taka nema þrettán mánuði. Á meðan eigi ekki að hrófla við neinu á vellinum, nefndin verði að hafa frítt spil þennan tíma. Það sé algjörlega fáránlegt að láta sér detta það í hug að einhverjir kostir yrðu úr sögunni meðan þessir þrettán mánuðir væru að líða.

Fjórir aðilar voru sagðir standa að flugvallarsamkomulaginu en nú segir Friðrik að tveir samningar hafi verið gerðir og aðeins borgarstjóri og innanríkisráðherra hafi skrifað undir þann hluta sem snýr að litlu flugbrautinni. Það hafi vakið sérstaka athygli sína að forsætisráðherra skyldi ekki einnig skrifa undir seinna samkomulagið. „Hann hefur jú verið einarður talsmaður þess að það þyrfti að tryggja stöðu þessa vallar.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.