Guðjón krefur Grindvíkinga um 12,5 milljónir

Fyrirtaka fór fram í gær í máli Guðjóns Þórðarsonar, fyrrum landsliðsþjálfara, gegn knattspyrnudeild Grindavíkur í Héraðsdómi Reykjaness. Guðjón krefur Grindvíkinga um 12,5 milljónir króna vegna vangoldinna launa.

Guðjón var ráðinn þjálfari Grindavíkur í október 2011 og var gerður við hann þriggja ára samningur. Stjórn knattspyrnudeildar Grindavíkur ákvað að segja upp launalið við Guðjón þann 1. október 2012. Grindavík hafði þá um sumarið fallið úr Pepsi-deild karla. Liðið hlaut aðeins 12 stig og var 15 stigum frá því að bjarga sér frá falli. Það er versti árangur Grindavíkur frá upphafi í efstu deild.

Í stefnu Guðjóns segir að uppsögn á launalið hafi aðeins verið til málamynda. Stefndi hefði ekki haft nein áform um að semja við stefnanda um nýja fjárhæð launaliðar svo sem samningurinn gerði ráð fyrir. Hafi Guðjón verið tilbúinn að taka á sig lækkun í samræmi við bágari fjárhagsstöðu stefnda.

Samkvæmt heimildum Vísis þá mun Guðjón hafa fengið tilboð frá Grindvíkingum sem hafi hljóðað upp á fimmtíu þúsund krónur á mánuði út samninginn. Það mun hafa verið mikil launaskerðing sem þjálfarinn vildi ekki sætta sig við.

Guðjón var með um 410 þúsund krónur í mánaðarlaun hjá Grindavík samkvæmt stefnu. Grindvíkingar greiddu einnig húsaleigu hans að upphæð 170 þúsund krónur. Guðjón fer fram á að fá greidd laun frá 1. janúar 2013 og út samningstímann að upphæð 12.511.022 kr.-

Málið verður þingfest eftir um mánuð. Reikna má með niðurstöðu í málinu snemma á næsta ári.