Arnór framlengdi | Styttist í endurkomuna

Landsliðsmaðurinn Arnór Þór Gunnarsson er búinn að skrifa undir nýjan samning við þýska úrvalsdeildarfélagið Bergischer HC.

Nýi samningurinn er til tveggja ára. Lið Bergischer hefur komið allra liða mest á óvart í þýsku úrvalsdeildinni.

Arnór byrjaði leiktíðina með miklum látum en varð síðan fyrir því óláni að kjálkabrotna.

"Ég fer í skoðun 29. október. Þá eru komnar sex vikur frá því ég fór í aðgerð og vonandi fæ ég góðar fréttir frá kjálkasérfræðingnum. Ég byrjaði strax viku eftir aðgerðina að lyfta fjórum sinnum í viku og hlaupa með strákunum á æfingu. Núna síðustu tvær vikurnar er ég einnig búinn að skjóta og vera meira með á æfingum án snertingar," sagði Arnór í samtali við norðursport.net.