Vilja sérstaka deild í baráttunni gegn ólöglegu niðurhali

Ef baráttan gegn ólöglegu niðurhali á að skila einhverjum árangri er nauðsynlegt að setja upp sérstaka deild innan lögreglunnar sem einbeitir sér að úrvinnslu slíkra mála. Þetta segir framkvæmdastjóri SMÁÍS. Ráðstefna norræna þjóða um um hugverkanefnd sendur nú yfir í Reykjavík.

Talið er að eigendur að höfundavörðu efni, tónlist og kvikmyndum einna helst, verði árlega fyrir fjárhagslegu tjóni sem nemur milljörðum króna. Þá er áætlað tap ríkissjóðs um hálfur milljarður vegna glataðra skatttekna samkvæmt útreikningum SMAÍS, Samtökum myndréttahafa á Íslandi. Framkvæmdarstjóri samtakanna segir að yfirstandandi ráðstefna sé mikilvæg í baráttunni gegn ólöglegu niðurhali.

„Alveg gríðarlega. Við erum hér með 80 einstaklinga frá öllum norðurlöndunum og meira að segja frá Bretlandi líka,“ segir Sæbjörn Steingímsson, framkvæmdastjóri SMÁÍS. „Hérna eru menn að, bæði skiptast á skoðunum og sýna hvað þeir eru að gera, hvað þeir telja vera rétt og miðla sinni reynslu. Þannig að klárlega er þetta mjög mikilvægt tól í þeirri baráttu.“

Snæbjörn segir að Ísland eigi að horfa einna helst til Svíþjóðar sem hefur sett upp sérstaka deild innan lögreglunnar sem einbeitir sér algjörlega að lögbrotum í vefheimum. Löggjöfin er nokkurn vegin sú sama en árangurinn í baráttunni er hinsvegar mun betri.

Paul Pinter er yfir umræddri deild í Svíþjóð. Hann segir árangurinn af þriggja ára starfi sínu vera mikinn. „Það hefur minnkað töluvert að því leyti að síðurnar sem voru í Svíþjóð hafa verið fluttar til útlanda,“ segir Pinter. Kjósi Íslendingar að fara sömu leið og Svíar þurfi þeir ekki að hafa áhyggjur af því að kostnaðurinn verði mikill.

„Það verklag sem við notum í Svíþjóð við deildina sem sér um brot af þessu tagi er mjög gott og það þarf ekki svo mikla peninga. Það þarf bara að stofna deild með nokkrum lögreglumönnum og lögfræðingum. Síðan er hægt að byrja að berjast gegn brotum af þessu tagi.“