Leikskólastjórinn hefur ekki séð myndböndin

Leikskólastjórinn á leiksskólanum 101, Hulda Linda Stefánsdóttir, kveðst ekki hafa séð myndböndin sem tveir starfsmenn skólans tóku upp og sendu til barnaverndaryfirvalda. Hún segir jafnframt að hvorki hún né aðrir starfsmenn leikskólans hafi nokkurn tímann orðið vitni að því að börn væru beitt ofbeldi eða harðræði innan veggja skólans.

Hulda Linda mætir á leikskólann á hverjum degi. Hún segir að ef hún hefði einhvern tímann orðið vitni að harðræði gagnvart börnunum, hefði að sjálfsögðu verið tekið strax á þeim málum. Enda mjög alvarlegt ef svo sé og þessar ásakanir sem komu upp séu alvarlegar.  

Hún telur það jafnframt alvarlegt að stúlkurnar hafi ekki látið sig vita af þessu strax, sérstaklega í ljósi þess að þetta eigi að hafa átt sér stað um nokkurt skeið. Önnur stúlkan sem tilkynnti ofbeldið og sú sem tók myndböndin upp hafi til dæmis ekki verið í vinnu síðan á föstudaginn í síðustu viku. Hún hafi þá haft samband við Huldu og látið vita að hún kæmi ekki til starfa vegna óviðráðanlegra aðstæðna en hún myndi vera í sambandi síðar. Hulda hefur ekki heyrt í stúlkunni síðan þá og frétti fyrst af þessum myndböndum í fyrradag, á svipuðum tíma og aðrir landsmenn.

Hún segir að ekki sé rétt að stúlkurnar hafi báðar verið sumarstarfsmenn, þær hafi verið ráðnar tímabundið og önnur átti að ljúka störfum snemma í haust en hin var með lengri samning.

Hulda hefur verið í sambandi við foreldra barnanna á leikskólanum og segist hafa fundið fyrir ótrúlega miklum stuðningi. En eðlilega séu allir í sjokki.

Ragnar Þorsteinsson sviðsstjóri hjá Skóla og frístundasviði Reykjavíkurborgar segist sáttur við þá ákvörðun leikskólastjórans að taka ekki á móti börnum á meðan að rannsókn málsins stendur yfir. Enda eigi börnin að njóta alls vafa. Málið sé þó nokkuð flókið fyrir foreldrana.

Hann segir borgina hafa mikinn skilning á þessu og muni hjálpa foreldrum eins og hægt er til þess að finna einhverja lausn vegna gæslu barnanna.