Nýr Audi A8

Audi mun kynna fjórðu kynslóð A8 bílsins á bílasýningunni í Frankfürt sem hefst eftir 3 vikur og bíða margir spenntir eftir að sjá gripinn með eigin augum. A8 bíllinn hefur talist flaggskip Audi síðan hann fyrst leit dagsins ljós árið 1994, enda stærsta gerð fólksbíla fyrirtækisins.

Núverandi þriðja kynslóð A8 kom árið 2010, en fyrsta árgerð þeirrar fjórðu verður af árgerð 2015 en kemur á markað á næsta ári. Audi hefur sagt að nýi bíllinn verði enn hæfari akstursbíll sem hlaðinn verður nýjungum og lúxus.

Af myndinni af nýja bílnum að dæma verður breytingin á ytra útliti hans meiri en varð á milli tveggja síðustu kynslóða. Bíllinn mun má fá ný Matrix LED aðalljós sem styðst við nýja tækni þar sem ljósin aðlaga styrk sinn eftir aðstæðum og birtu. Ef bíllinn mætir öðrum bíl í myrkri minnkar ljósstyrkurinn til þæginda fyrir þann sem á móti kemur.

Ekki er búist við neinum breytingum í vélarframboði og því verði 3,0 og 4,0 lítra TFSI bensínvélarnar áfram í boði, sem og W-12, 6,3 lítra bensínvélin. Sex strokka, 3,0 lítra dísilvélin er svo enn einn vélarkosturinn. Audi A8 hefur fengið sterkan samkeppnisaðila í formi nýrrar gerðar Mercedes Benz S-Class og því hefur Audi vafalaust flýtt sér að kynna þessa nýju kynslóð A8.