Toyota mun áfram smíða jeppa á grind

Þeim jeppum sem smíðaðir eru á grind en ekki plötu (unibody) hefur farið svo mikið fækkandi á undanförnum árum að varla er lengur til sá bíll þar sem undir honum er alvöru grind. Margir þeirra þykja því vart neinir jeppar lengur, frekar ofvaxnir fólksbílar og til að mynda er ekki hægt að breyta slíkum jeppum eða hækka þá.

Því mun margur jeppaáhugamaðurinn gleðjast yfir nýyfirlýstum áformum Toyota að hætta ekki að smíða nokkrar af bílgerðum sínum á grind þó svo sala þeirra hafi farið hnignandi á síðustu árum. Á þetta við bílana Land Cruiser, 4Runner, FJ Cruiser og Sequoia. Sem dæmi seldi Toyota aðeins 78.457 bíla af þessum fjórum gerðum í fyrra í Bandaríkjunum en Highlander jepplingurinn einn og sér seldist þar í 121.055 eintökum.

Með þessari ágætu ákvörðun Toyota markar fyrirtækið sér sérstöðu því þekktir jeppaframleiðendur eins og Ford, General Motors og Chrysler eru svo til hættir að framleiða bíla á grind og standa aðeins bílarnir Ford Expedition og Chevrolet Tahoe/GMC Yukon eftir.