Aukinn kvóti skapar nær 16 milljarða í útflutningsverðmætum

Sá aukni kvóti sem Hafrannsóknarstofnun leggur til í mörgum af nytjastofnum okkar skapar 15 til 16 milljarða kr. í auknum útflutningsverðmætum. Þetta kemur fram í Morgunkorni greiningar Íslandsbanka sem hefur upphæðina eftir upplýsingum frá LÍÚ.

Upphæðin nemur hátt í prósentustigi í aukinni landsframleiðslu. Hér munar mest um 20 þúsunda tonna aukinn þorskkvóta en sú aukning ein og sér mun auka landsframleiðsluna um ríflega 0,3 prósentur varlega áætlað eins og kemur fram í Fréttablaðinu í dag.

Að mati Hafró hefur bæði viðmiðunarstofn og hrygningarstofn þorsks vaxið hratt á undanförnum árum og er hrygningarstofninn nú þrefalt stærri en þegar hann var í lágmarki á árunum 1992 til 1994. Einnig er viðmiðunarstofninn stærri en hann hefur verið undanfarna þrjá áratugi, að því er segir í Morgunkorninu.

„Segir stofnunin að þar sem nýliðun á undangengnum áratug hafi verið nokkuð undir meðallagi þá er stækkun stofnsins á undanförnum árum afleiðing minni sóknar. Að mati Hafró eru horfur á að stofninn haldi áfram að styrkjast ef nýting hans verður með sama hætti, og telur Hafró líkur á að hægt verði að auka þorskaflann í 250 þús. tonn á komandi árum, að því tilskyldu að aflareglunni verði fylgt. Ljóst er að þessi aflaaukning í þorski verður kærkomin búbót fyrir hagkerfið ef af henni verður,“ segir í Morgunkorninu



„Í skýrslu Hafrannsóknarstofnunar segir að margir af okkar nytjastofnum séu í ágætu jafnvægi og nýting þeirra sé hófleg. Breytingar í stofnstærð og ráðgjöf markast því gjarnan af breytilegri nýliðun stofnanna. Þannig virðist t.d. gullkarfastofninn vera í góðum vexti vegna bættrar nýliðunar og jafnframt eru merki um að nýliðun í ufsastofni sé um eða yfir meðallagi. Ráðleggur stofnunin aukinn kvóta í báðum tegundum. Þá virðist íslenski sumargotssíldarstofninn vera að styrkjast. Samkvæmt upplýsingum frá LÍÚ gæti útflutningsverðmæti aukist um 15-16 milljarða kr. á næsta fiskveiðiári vegna þeirrar aukningar sem Hafrannsóknarstofnun leggur til í helstu íslenskum stofnum.“