Vestmannaeyjabær nýtir forkaupsrétt að dragnótaskipi

Nú fyrir skömmu lauk aukafundi bæjarráðs Vestmannaeyja þar sem samþykkt var að neyta þess forkaupsréttar sem sveitarfélögum er áskilinn í lögum um stjórn fiskveiða.  Þar með gengur Vestmannaeyjabær inn í fyrirhugaða sölu á dragnótaskipinu Portland VE97 ásamt með öllu sem því fylgir og fylgja ber að engu undanskildu þ.m.t. tilheyrandi aflahlutdeild skipsins og veiðarfærum.

Þetta kemur fram í skeyti frá Elliða Vignissyni bæjarstjóra í Vestmannaeyjum. Þar segir að Vestmannaeyjabær þakkar væntanlegum kaupanda og seljanda þá virðingu sem íbúum í Vestmannaeyjum var sýnd með því að virða þann forkaupsrétt sem kveðið er á um í lögum um stjórn fiskveiða.  Slíkt er til eftirbreytni og til þess fallið að skapa aukna sátt um sjávarútveg.  Með þessu finna íbúar einlægan vilja útgerðamanna til að standa vörð um þau byggðarlög sem eru jarðvegur sjávarútvegsins.  Viljinn til samstarfs um sameiginlega hagsmuni verður því gagnkvæmur.

Ferill þessa máls sýnir að þegar farið er að lögum um stjórn fiskveiða eins og þau voru samþykkt af löggjafanum eykst öryggi sjávarbyggða til muna.  Með forkaupsréttinum er tryggt að aflaheimildir flytjist ekki á milli atvinnusvæða á meðan útgerðir á staðnum treysta sér til að gera út á hagkvæman máta.  Íbúar sjávarbyggða eru þeir sem líða fyrir það þegar útgerðir eru seldar án þess að forkaupsréttarákvæðið sé virt.

Vestmannaeyjabær vill nota þetta tækifæri til að skerpa á þessu mikilvæga ákvæði sem tekur á forkaupsrétti og leita enn frekari leiða til að tryggja öryggi sjávarbyggða.

Enn fremur minnir Vestmannaeyjabær á þau málaferli sem nú standa yfir gagnvart kaupanda og seljanda útgerðarinnar Bergs-Hugins og varðar þetta sama ákvæði.  Með því mun Vestmannaeyjabær láta reyna á réttarfarslega stöðu sveitarfélaga þegar forkaupsréttur er ekki virtur.