Hrun í lokin gegn Lúxemborg

Íslenska karlalandsliðið í körfuknattleik beið lægri hlut 88-61 gegn heimamönnum í Lúxemborg á Smáþjóðaleikunum í kvöld.

ÍSlendingar áttu í fullu tré við heimamenn í fyrri hálfleiknum. Þeir leiddu stærstan hluta hans en staðan í hálfleik var 36-35 heimamönnum í vil.

Enn var leikurinn í járnum í þriðja leikhluta og að honum loknum var staðan 60-54 Lúxemborg í vil. Okkar menn skoruðu hins vegar aðeins sjö stig í lokafjórðungnum gegn 28 stigum heimamanna. Munurinn í leikslok var því 27 stig og stórt tap staðreynd.

Brynjar Þór Björnsson var sprækastur í íslenska liðinu með 18 stig auk þess að taka fimm fráköst. Jóhann Árni Ólafsson skoraði tólf stig og Ragnar Nathanaelsson tók sjö fráköst.

„Við byrjuðum af krafti og hittum mjög vel. Við náðum samt ekki að nýta okkur það nógu vel í vörninni. Við vorum vel inni í leiknum í byrjun seinni hálfleik en við þreyttum okkur svo sjálfir með því að gera erfiða hluti," sagði Axel Kárason fyrirliði Íslands.

„Lúxemborg gekk á lagið og því miður fjaraði leikurinn bara út ef segja má svo. Við létum ýmsa hluti fara í taugarnar á okkur í fjórða leikhluta og munurinn var óþarflega mikill."