Vilja reisa 100 leiguíbúðir í Vatnsmýrinni

Eigendur fasteignafélagsins S10 vilja reisa hundrað leiguíbúðir í Vatnsmýrinni og segja skilyrði fyrir byggingunum uppfyllt. Þeir undra sig á seinagangi borgarinnar í málinu en formaður borgarráðs segir lóðina sem um ræðir falla undir fyrirhugaða skipulagssamkeppni um háskólasvæðið.

Deila um framtíð þessarar lóðar í Vatnsmýrinni, við Sturlugötu 8, hefur staðið í nokkur ár. Eigendur fasteignafélagsins S10 vilja byggja 100 leiguíbúðir á lóðinni en ekki hefur fengist grænt ljós á það frá Reykjavíkurborg.

Árið 2008 gerðu S10 ehf og Framkvæmda- og eignasvið Reykjavíkurborgar samning um kaup byggingarréttar, en þá stóð til að stækka hús Íslenskrar erfðagreiningar. Borgarráð staðfesti ekki samningsgerðina og lauk málaferlum með dómssátt þar sem borgin viðurkenndi forgangsrétt S10 til lóðarinnar, með þeim fyrirvara að skipulagi Vatnsmýrar yrði lokið.

Nú er á lóðinni hverfismiðstöð gatnamálastjóra en Jóhann Halldórsson, framkvæmdastjóri S10, segir að til standi að færa hana og að skipulag um Vatnsmýrina liggi fyrir.

„Í kjölfar þess viljum við byggja hér íbúðarhúsnæði og við erum búin að leggja fram erindið við borgarráð þar sem við óskum eftir heimild til þess að byggja hér hundrað íbúðir."

Jóhann vísar í nýleg orð Dags B. Eggertssonar, formanns borgarráðs, um þörf á leiguhúsnæði í borginni.

„Við erum tilbúin og við bíðum bara eftir því að hann standi við stóru orðin og úthluti okkur þessa lóð endanlega svo hér geti hafist framkvæmdir."

Dagur segir skipulagskeppni fyrir háskólasvæðið fyrirhugaða og að umrædd lóð muni falla þar undir.

„Þannig að á meðan það liggur ekki fyrir, nákvæmlega hvernig skipulagið er, hefur borgin ekki viljað ráðstafa lóðinni. Og skipulagssamkeppnin á að fjalla um það, hvernig við nýtum þetta lykilsvæði í borginni best.“