Gunnar Andrésson tekur við Gróttuliðinu

Gunnar Andrésson hefur gengið frá þriggja ára samningi um að taka við liði Gróttu af Ágústi Jóhannssyni sem er á leiðinni til Danmerkur á næsta tímabili. Þetta kemur fram í fréttatilkynningu frá Gróttu. Það er ekki enn ljóst í hvaða deild Grótta spilar því liðið er á leiðinni í umspil um laust sæti í N1 deild karla.

Gunnar Andrésson þjálfaði áður Aftureldingu í Mosfellsbæ og kom þeim upp í N1 deild karla fyrir tveimur árum og einnig þjálfaði hann í Sviss við góðan orðstír. Hann hefur ekki þjálfað meistaraflokk fyrr en að hann hætti óvænt með Mosfellsliðið í október 2011.

„Við erum sérlega ánægð að hafa krækt í Gunnar sem næsta þjálfara meistaraflokks og erum viss um að með honum náum við að halda áfram þeirri vegferð sem lagt var af stað í fyrr með Ágústi. Gunnar hefur náð góðum árangri, bæði sem leikmaður og þjálfari og við erum sannfærð um að hann muni hjálpa okkur í þeirri uppbyggingu sem við vinnum að í handboltanum á Seltjarnarnesi" segir Davíð B. Gíslason, varaformaður handknattleiksdeildar Gróttu, í umræddri fréttatilkynningu.

„Ég er spenntur að taka við þessu starfi hjá Gróttu" segir Gunnar Andrésson. „Seltirningar hafa náð að skapa góða umgjörð í kringum handboltann og það er margt spennandi að gerast þar. Meistaraflokkurinn samanstendur að mestu af uppöldum ungum leikmönnum sem eiga framtíðina fyrir sér auk þess sem margir ungir leikmenn eru að koma upp sem munu láta að sér kveða. Það er frábært tækifæri að fá að hafa áhrif á þessa þróun og freista þess að koma meistaraflokki í hóp þeirra bestu á komandi árum," sagði Gunnar í fréttatilkynningunni.

Grótta tryggði sér á dögunum sæti í umspili um sæti í N1 deild karla og mun mæta Valsmönnum í þeirri keppni eftir páska. Fyrsti leikur liðanna er í Vodafone-höllinni á Hlíðarenda þriðjudaginn 9. apríl næstkomandi.