Frítt á leiki laugardagsins í Digranesi

Boðið verður upp á svokallaðan tvíhöfða hjá handboltaliðum HK í íþróttahúsinu í Digranesi nú á laugardaginn.

Klukkan 13.00 mætir kvennalið HK liði Fylkis í N1-deild kvenna og svo klukkan 15.00 er komið að leik HK og Fram í N1-deild karla.

Fram kemur í fréttatilkynningu frá HK að frítt sé á báða leikina í boði verðbréfafyrirtækisins Virðingar.

Bæði karla- og kvennalið HK eru í fimmta sæti í sínum deildum. Karlaliðið á í harðri baráttu um sæti í úrslitakeppninni en kvennalið HK stendur betur þar sem sex efstu liðin komast í úrslitakeppni N1-deildar kvenna, en aðeins fjögur hjá körlunum.