Svona lítur nýja skipulagið út með skertum flugvelli

Nýtt deiliskipulag Reykjavíkurflugvallar, sem samþykkt var í borgarráði á fimmtudag, verður formlega auglýst 23. desember, á Þorláksmessu. Þeim sem telja sig eiga hagsmuna að gæta er veittur frestur til 3. febrúar 2014 til að gera athugasemdir.

Samkvæmt skipulaginu verður flugvöllurinn lagður niður í áföngum frá 2015 til 2024 og minnstu flugbrautinni lokað strax. Hanna Birna Kristjánsdóttir innanríkisráðherra lýsti því yfir á Alþingi í gær að staðið yrði við samkomulag um að flugmálayfirvöld tilkynni um lokun brautarinnar fyrir áramót. Henni yrði þó ekki lokað fyrr en flugvallarnefnd undir forystu Rögnu Árnadóttur hefði komist að niðurstöðu um framtíðarstaðsetningu.

Í sérstakri bókun meirihluta borgarráðs segir að framkvæmdir við blandaða byggð geti hafist á Hlíðarendasvæði en horft verði til vinnu flugvallarnefndar áður en lokið verður við alla skipulagsgerðina í Skerjafirði í því skyni að útiloka ekki hugsanlega kosti.

Brotthvarfi flugvallarins er lýst í deiliskipulaginu með þessum lykiltímasetningum: Norðaustur-suðvesturbraut (06-24) lögð af 2013. Æfinga-, kennslu- og einkaflug lagt af 2015. Norður-suðurbraut lögð af 2022. Flugvallarstarfsemi lögð af með öllu 2024.

Um flugbrautir segir:

„Á skipulagssvæðinu eru tvær flugbrautir; ein norður/suður; merkt 20-02 og ein austur/vestur 32-14. Norð-austur/suð-vestur flugbraut, merkt 06/24 er lögð niður með gildistöku þessa deiliskipulags.“

Leyft verður að gera veg á uppfyllingu út í Fossvog við ylströndina sem eingöngu strætisvagnar fá að aka um vegna nýja hverfisins í Skerjafirði: „Gert er ráð fyrir mögulegri landfyllingu suður fyrir norður/suðurbraut fyrir strætisvagnaleið í tengslum við uppbyggingu íbúðabyggðar í Skerjafirði.“ 

Þá verður leyft að byggja flugstöð á reit austan við afgreiðslu Flugfélags Íslands.

Í almennum skilmálum segir að allar byggingar sem samþykktar eru á svæðinu séu háðar ákvæðum aðalskipulags um tímamörk flugvallarstarfsemi í Vatnsmýrinni. Framkvæmdaaðilar leggi því í framkvæmdir með skilning á því að um tímabundnar byggingar sé að ræða. Hvorki Reykjavíkurborg, né stofnanir hennar, verði skuldbundnar til greiðslu bóta komi til krafa um brottflutning þeirra. Öll mannvirki á svæðinu eftir 2013 skuli hönnuð þannig að auðvelt sé að fjarlægja þau. Þó verður heimilt að byggja við flugstjórnarmiðstöð og flugturn.