Telur ákæru fram komna vegna umfjöllunar á netinu

Lögreglumaður hefur verið ákærður fyrir líkamsárás og brot í opinberu starfi. Atvikið náðist á myndband sem vakti mikla athygli Snorri Magnússon, formaður Landssambands lögreglumanna, telur líklegt að ákæran sé fram komin meðal annars vegna umfjöllunar í fjölmiðlum og á netinu.

Handtakan sem um ræðir náðist á myndband sem fór sem eldur um sinu á netinu í sumar. Vísir greindi frá málinu í morgun.

Snorri Magnússon, formaður Landssambands lögreglumanna, sagði á sínum tíma, í samtali við Vísi, að handtakan væri ekki verið óeðlileg og að lögreglumaðurinn hefði beitt viðurkenndum aðferðum. Hann stendur við þau ummæli.

„Jájá. Handtökur líta aldrei vel út. Sama hvaðan frá er horft. Þessi lítur sérstaklega illa út vegna þessa blessaða bekks sem konan skellur utan í. Miður að það hafi gerst. En, handtökuaðferðin sem beitt er, samkvæmt því sem ég kemst næst og af þeim sem sjá um kennslu á þeim hlutum; algerlega í takti við þær kennslubækur sem stuðst er við í þeim efnum.“

Lögmaður konunnar umræddu vildi í morgun ekkert láta eftir sér hafa um málið, né heldur Stefán Eiríksson lögreglustjóri sem vísar á ríkissaksóknara; æðsta handhafa ákæruvaldins. En, ákæran kemur Snorra mjög á óvart, ekki síst eftir lestur ákæruskjalsins, sem hann segir afar sérkennilegt.

„Ég hef lesið ákæruskjalið sjálft. Og þetta kemur mér sannarlega og vissulega á óvart. Að lesa þetta út frá ákæruskjalinu. Þar er ýjað að því að handtakan hafi verið án fyrirvara. Og fleira í þeim dúr. Að handtakan hafi verið ástæðulaus.“ Snorri getur ekki séð að svo sé: „Nei, ég verð að segja það alveg eins og er. Eftir að búið er að hrækja á viðkomandi lögreglumann?“

Aðspurður telur Snorri umfjöllun um málið hafa haft áhrif á það að til ákæru kom. „Nú er oft erfitt að vera spámaður í einhverju svona. En vissulega hvarflar sú hugsun að manni. Ef einhver fótur væri fyrir slíku er illa fyrir okkur komið sem störfum í þessari stétt. Erfitt að eiga við það að handtaka fólk sem brotið hefur af sér ef eftirmáli á að stjórnast af fjölmiðlaumfjöllun og ég tala nú ekki um, einhverri Facebook-umfjöllun.“