Halda í upprunann

Með heimsfrægðina innan seilingar tóku krakkarnir í Of Monsters and Men sig til og spiluðu fyrir aðdáendur sína hér heima á Íslandi í síðustu viku.

Sveitin hélt þrenna tónleika á heimavelli sínum á Faktorý á fimmtudag, föstudag og laugardag og uppselt var á þá alla. Það kom í hlut tónlistarkonunnar Lay Low að hita upp sviðið öll kvöldin áður en sveitin steig á stokk.

Hljómsveitarmeðlimirnir verða á landinu í nokkra daga í viðbót en halda svo áfram að sigra heiminn í lok mánaðarins. Þau halda þá til Japan þar sem fyrirhugaðir eru tónleikar í Tókýó 24. janúar. Þaðan fara þau til Singapúr og Nýja-Sjálands og taka þátt í Laneway Festival áður en þau hefja tónleikaferð um Ástralíu þann 29. janúar.