Daniel Day Lewis getur brotið blað í kvikmyndasögunni

Verðlaunaafhendingatímabilið í kvikmyndageiranum nær hámarki í kvöld þegar Óskarsverðlaunin verða afhent við hátíðlega athöfn í Hollywood.

Kvikmyndin Lincoln í leikstjórn Stevens Spielberg er með flestar tilnefningar til Óskarsverðlaunanna í ár eða tólf talsins þar á meðal sem besta myndin ásamt átta öðrum myndum. Mynd Angs Lee, Life of Pi, fær ellefu tilnefningar og myndin Silver Linings Playbook er með sex.

Í flokki bestu leikkona í aðalhlutverki etja kappi elsta og yngsta kona sem tilnefndar hafa verið eða þær Emmanuelle Riva, 85 ára, fyrir leik sinn í Amour og hin níu ára Kvavennsinei Wallis fyrir leik sinn í Beasts of the southern Wild.

Erlendir fjölmiðlar telja að myndin Argo í leikstjórn Bens Affleck sé sigurstranglegust í flokknum besta myndin en Ben á hins vegar ekki möguleika á að vera valinn besti leikstjóri þar sem hann er ekki tilnefndur, en hann hefur verið valinn besti leikstjóri á mörgum helstu verðlaunahátíðum undanfarnar vikur.

Þá er ekki talið að Lincoln hreppi margar gullstyttur þrátt fyrir margar tilnefningar, talið er mjög líklegt að leikarinn Daniel Day Lewis slái Óskarsverðlaunamet í kvöld ef hann hlýtur verðlaun sem besti leikari í aðalhlutverki fyrir leik sinn í myndinni Lincoln en það yrði þá í fyrsta skipti sem leikari hlýtur þau verðlaun í þrisvar sinnum.

Þá bíða eflaust margir eftir að sjá hvernig stjörnurnar koma klæddar til hátíðarinnar og vekur það oft ekki minni athygli hverjir verða sigurvegarar rauða dregilsins en verðlaunaathafnarinnar sjálfrar.