Uglur Heiðdísar slá í gegn

Ugluteikningar vekja athygli og verða innblástur  skartgripahönnunar Siggu og Timo í Hafnarfirði. 

„Ég er ótrúlega glöð og lánsöm að hafa fengið þetta tækifæri nánast upp í hendurnar.

Ég setti bara teikningar sem ég var að gera á Facebook og fólk tók svo vel í þetta. Máttur internetsins er ótrúlegur,“ segir Heiðdís Helgadóttir sem er menntuð úr Listaháskólanum með BA-próf í arkitektúr.

Á dögunum ferðaðist Heiðdís til London til að læra meiri tækni í teikningu og segist hafa ákveðið að fara teikninámskeið til þess að víkka sjóndeildarhringinn og teikna eitthvað annað en uglur.

Uglurnar hafi einfaldlega verið áhugamál og óvart orðið vinsælar. Námskeiðið mun hafa verið mjög lærdómsríkt en hún segist hafa lært heilmikla tækni af kennaranum í myndskreytingu frá Central Saint Martins sem fræddi nemendur sína um borgina í leiðinni.

„Ég fór á námskeið þar sem við löbbuðum um borgina í rólegheitum og teiknuðum byggingar en ég elska Hafnarfjörð og mig langar svo að teikna litlu fallegu húsin þar. Hús heilla mig enda lærði ég arkitektúr.“

Heiðdís segir að það sé litla vinnu að fá í þessum geira og því sé hún þakklát fyrir þennan mikla áhuga á myndunum. Hún segist þó þurfa að vera öguð og vakna snemma á morgnanna til að byrja að teikna.

„Þetta er alveg 300% vinna. Ég þarf eiginlega fleiri klukkustundir í sólarhringnum núna því það er brjálað að gera hjá mér og ég hef ekki undan við að teikna til að anna eftirspurninni.

Ég er raunverulega farin að vanrækja vini og vandamenn,“ segir hún hlæjandi. Það er margt í deiglunni en fram undan er meðal annars samstarf við skartgripahönnuðina Siggu og Timo.

Þau hafa sýnt áhuga á að fá Heiðdísi til að teikna myndir sem þau nota sem hugsmíðaafl í hönnun sína.

„Mér skilst að Sigga hafi séð einhvern pakka inn mynd eftir mig í blómabúð og henni fannst þetta svo nýtt og ferskt. Mér finnst þetta ótrúlega spennandi tækifæri en þau hafa aldrei áður fengið utanaðkomandi í svona samstarf.“