Tvöfalt kjördæmisþing niðurstaðan

Framsóknarmenn í Norðausturkjördæmi hyggjast velja á framboðslista flokksins fyrir Alþingiskosningarnar í vor á tvöföldu kjördæmisþingi. Kosið var um aðferð við val á listann á kjördæmisþingi í Mývatnssveit í gær.

Á þinginu var afgerandi stuðningur við tvöfalt kjördæmisþing en sá valkostur hlaut 115 atkvæði. Sá valkostur sem kom næstur var lokað prófkjör með 48 atkvæði. Tveir gefa kost á sér í forystusæti listans: Sigmundur Davíð Gunnlaugsson, formaður Framsóknarflokksins og þingmaður í Reykjavík, og Höskuldur Þór Þórhallsson, þingmaður í Norðausturkjördæmi.

?Ég held að þetta sé langskynsamlegasta leiðin. Hún hefur verið notuð í þessu kjördæmi alllengi og reynst vel,? segir Sigmundur Davíð og bætir við: ?Ég held að þetta eigi eftir að þjappa flokknum saman og undirbúa hann fyrir kosningabaráttuna.?

Þá segir Sigmundur að umræður á kjördæmaþinginu hafi ekki verið sérstaklega harðar heldur hafi fundarmenn lagt áherslu á að sætta sig við þá niðurstöðu sem yrði ofan á. Ekki náðist í Höskuld Þór í gærkvöldi en í samtali hans við Ríkisútvarpið í gær kom fram að hann studdi lokað prófkjör. Þá sagði Höskuldur að lýðræðislegustu leiðinni við val á framboðslista hefði verið hafnað en bætti við að hann væri óhræddur við að bjóða sig fram og myndi sætta sig við þá niðurstöðu tvöfalda kjördæmisþingsins. -mþl