Iceland Airwaves í viðbragðsstöðu

Skipuleggjendur tónlistarhátíðarinnar Iceland Airwaves eru í viðbragðsstöðu vegna fellibyljarins Sandy.

Sextán hljómsveitir og tónlistarmenn frá Bandaríkjunum eiga að spila á hátíðinni og stíga þeir fyrstu á svið á fimmtudaginn. Að auki koma hingað um eitt þúsund tónleikagestir frá Bandaríkjunum, þar af í kringum þrjú hundruð frá New York sem er á austurströndinni. Icelandair frestaði í gær flugferðum frá JFK-flugvellinum í New York sem áttu að vera í dag en vonast til að geta flogið í staðinn á miðvikudaginn.

„Eins og staðan er núna erum við ekki mjög áhyggjufull,“ segir Grímur Atlason, framkvæmdastjóri hátíðarinnar. „Ég hef engar risaáhyggjur að við lendum í dagskrárrugli en auðvitað viljum við að sem flestir af gestunum verði komnir á miðvikudaginn. Við gætum fríkað út en það væri ekki í anda þess sem við erum að gera.“

Ein hljómsveitanna, Shearwater, sem átti að koma með miðvikudagsvélinni frá New York flaug í staðinn til Íslands frá Washington í gær. Önnur grúppa, Swans, á að fljúga annað kvöld frá New York en áætlað er að hún spili á fimmtudagskvöld. Aðspurður segist Grímur hafa minni áhyggjur af hljómsveitum og tónleikagestum sem koma frá öðrum borgum Bandaríkjanna eins og Denver, Seattle og Boston.