Afgangur af rekstri Reykjavíkur 2013

Gert er ráð fyrir að samstæða Reykjavíkurborgar skili 7,6 milljarða króna afgangi á næsta ári. Þar af stendur til að A-hluti hennar, hinn eiginlegi rekstur borgarinnar, skili 329 milljóna króna afgangi. Borgarstjórnarmeirihluti Besta flokksins og Samfylkingarinnar kynnti í gær fjárhagsáætlun fyrir árið 2013 og svokallaða fimm ára áætlun fyrir árin 2013 til 2017.

Jón Gnarr borgarstjóri kynnti áætlunina á kynningarfundi í Ráðhúsinu með þeim orðum að hún leiddi í ljós að hagur borgarinnar væri að vænkast. „Við höfum ástundað það sem við höfum gjarnan kallað ömmuhagfræði sem einkennist af sparnaði, ábyrgð og niðurgreiðslu skulda. Jafnframt höfum við staðið þétt við velferðarmálin og nú er svo komið að við leggjum fram fjárhagsáætlun sem er að mestu leyti gleðileg.“

Í áætluninni er gert ráð fyrir að rekstrartekjur borgarinnar verði 126 milljarðar á árinu 2013 en rekstrargjöld 107 milljarðar. Þá mun handbært fé frá rekstri nema 28,5 milljörðum, standist áætlunin, en þar af renna 20,9 milljarðar í afborganir og vexti af skuldum.

Til samanburðar stefnir í að handbært fé frá rekstri verði 25,3 milljarðar á þessu ári miðað við 119 milljarða í rekstrartekjur og 101 milljarð í rekstrargjöld. Rekstrarniðurstaða á þessu ári er hins vegar ráðgerð neikvæð um tæplega milljarð.

Dagur B. Eggertsson, formaður borgarráðs, tók einnig til máls á kynningarfundinum í gær. Vakti hann meðal annars athygli á þeirri áskorun borgarinnar að einstaklingum sem þurfa fjárhagsstoð frá borginni myndi fjölga um mörg hundruð um áramótin þar sem réttur þeirra til atvinnuleysisbóta væri þá runninn út.

Sagði Dagur að fjárframlög til fjárhagsaðstoðar myndu af þessum sökum aukast um ríflega milljarð króna. „Þar að auki munum við setja töluverða peninga í atvinnutengd átaksverkefni fyrir þennan hóp og í framkvæmdir,“ sagði Dagur. Alls mun borgarsjóður verja um sjö milljörðum í framkvæmdir á næsta ári en meðal þess sem stendur fyrir dyrum eru gagngerar endurbætur á Hverfisgötu.

Eins og áður sagði var einnig kynnt fjárhagsáætlun til fimm ára í gær. Þar er gert ráð fyrir stigbatnandi rekstrarniðurstöðu og örri niðurgreiðslu skulda. Standist áætlunin mun Reykjavíkurborg uppfylla nýlegar reglur um hlutfall skulda sveitarfélaga af reglulegum tekjum árið 2016. Samkvæmt reglunum má það hlutfall ekki vera hærra en 150%. Þá er gert ráð fyrir því að útsvarshlutfall og gjaldskrárprósentur hjá borginni verði óbreytt öll þessi fimm ár.