Fótboltaþjálfari vill á þing

Willum Þór Þórsson, fótboltaþjálfari, hefur ákveðið að gefa kost á sér í fyrsta sætið á framboðslista Framsóknarflokksins í suðvesturkjördæmi fyrir alþingiskosningarnar nú í vor. Willum Þór er einn reyndasti fótboltaþjálfari landsins, samkvæmt fréttasíðunni fótbolti.net.

Willum virðist telja að reynslan úr boltanum muni skila sér vel á þingi. „Ég hef lært það í íþróttunum að ég er hluti af liðsheild. Það er kraftur og byr með Framsóknarmönnum í dag og áður en maður fer í sterkar yfirlýsingar þá er þessi barátta fyrsta skrefið. Í kjölfarið fáum við sterkara lið. Þannig virkar þetta í íþróttunum og þannig virkar þetta hjá okkur," segir hann í samtali við fotbolta.net.

Willum segist lengi hafa stutt Framsóknarflokkinn og hefur fundið samhljóm með sínum skoðunum þar á bæ.

Willum Þór er menntaður rekstarhagfræðingur auk þess að vera með kennsluréttindi frá HÍ. Hann hefur starfað við kennslu í MK og HR síðustu ár ásamt því að vera þjálfari í knattspyrnu.