Heræfing vegna Ólympíuleikanna í Lundúnum

Yfirvöld í Bretlandi vinna nú að undirbúningi fyrir Ólympíuleikana sem haldnir verða í Lundúnum í sumar. Að því tilefni munu land- og sjóher Bretlands standa fyrir hernaðaræfingu í Lundúnum og Weymouth í þessari viku.

Æfingin er kölluð Olympic Guardian og munu herskip, þyrlur og fótgönguliðar taka þátt í henni.

Gríðarlegur viðbúnaður verður hjá yfirvöldum í Bretlandi vegna leikanna. Þá kom í ljós í gær að flugskeytapöllum verður komið fyrir ofan á fjölbýlishúsum í austurhluta Lundúna.

Flugskeytin verða notuð til að granda árásarflugvélum sem hryðjuverkamenn kunna að nota á meðan leikunum stendur.

En íbúar í austurhluta Lundúna eru hreint ekki sáttir með þessar fyrirætlanir.

Um 700 manns búa á svæðinu og hafa þeir fengið kynningarbækling um flugskeytapallana frá breska hernum.

Þá sagði einn íbúi að loftskeytin myndu skilja eftir sig brak út um allt hverfið verði þeim skotið.