Kraftmesti "rib“ bátur Íslands sigldi á sker

Kraftmesti „rib"bátur landsins lenti á skeri á ferð sinni frá Reykjavík til Akureyrar í morgun. Óhappið varð rétt norðan Sauðárkróks. Við byltuna brotnuðu bæði hældrif bátsins. Tjónið er að sögn mikið og viðgerð gæti tekið 2-3 vikur.

Bátur þessi er engin smásmíð, en hann er 12 metrar á lengd, vegur ein 5,5 tonn og búinn 700 hestafla vél. Hann er nefndur eftir Jóni Páli kraftajötni, enda kraftmesti bátur landsins.

Fyrirhugað var að sigla með ferðamenn milli Akureyrar og Reykjavíkur í sumar. Gert var ráð fyrir að byrja ferðirnar um næstu helgi en nú lítur út fyrir að bið verði á því.

Bátar af þessari gerð njóta mikilla vinsælda meðal ferðalanga, ekki síst þeirra sem sækja í spennu. Þegar báturinn er á fullri ferð er tilfinningin svipuð því að „stinga hausnum út um gluggann á bíl á 90 km/klst hraða".

Fjallað var um bátinn í Ísland í dag í gær og hægt er að horfa á innslagið hér að ofan.