Sögðust hafa „fundið skilríki á víðavangi“

Fimm sextán ára stúlkur og ein sautján ára reyndust vera inni á skemmistað í Reykjanesbæ þegar lögreglan á Suðurnesjum var með hefðbundið eftirlit á skemmtistöðum um helgina, samkvæmt upplýsingum frá lögreglunni á Suðurnesjum. Þær voru allar undir lágmarksaldri samkvæmt lögum.

Sumar þeirra framvísuðu skilríkjum sem þær höfðu „fundið" á víðavangi að eigin sögn, að því er segir í tilkynningu. Stúlkurnar voru allar færðar á lögreglustöð og haft samband við foreldra þeirra sem komu og sóttu þær. „Að því búnu fóru lögreglumenn aftur á umræddan skemmtistað til að ganga endanlega úr skugga um að ekki væru fleiri undir lögaldri þar inni. Svo reyndist ekki vera," segir í tilkynningu frá lögreglunni.