Hænsnabóndi óttast að hann sé á leið á götuna

Júlíus Már Baldursson, sem hefur rekið landnámshænsnabú á bænum Tjörn í Vatnsnesi við Hvammstanga, óttast að hann sé kominn á götuna. Hann og bróðir hans voru ábúendur á Hvammstanga um árabil áður en allt brann í mars 2010. Jörðin, var leigujörð og skráð á bróður hans, en þegar allt brann þá var þeim samningi rift og Júlíus Már óskaði eftir að fá jörðina skráða á sig. Aftur á móti fékk hann þau skilaboð að ráðuneytið yrði að auglýsa jörðina, þrátt fyrir að Júlíus hefði búið á henni um árabil og verið með lögheimili sitt skráð á henni.

„Það dróst að auglýsa jörðina og endaði með því að ég sendi bara inn fullbúna umsókn í apríl í fyrra," segir Júlíus. Sú umsókn hafi ekki verið tekin gild og jörðin ekki verið auglýst fyrr en seint og síðar meir. Þá hafi ráðuneytið aftur hvatt hann til að sækja um. Hann hafi svo loksins fengið svar á föstudaginn um að hann fengi ekki jörðina. Það hafi verið mjög svekkjandi, enda hafi hann verið í uppbyggingarstarfi í þrjú ár.

„Ég er kominn með nýjan stofn og ég er búinn að kaupa nýja kæla fyrir eggin og ég er búinn að kaupa nýjar útungunarvélar. Ég sit uppi með það og sennilega verð ég bara að hætta og selja þetta. Það er verið að henda mér, öryrkja á götuna með lifandi dýr og fugla og þeim er bara alveg slétt sama," segir Júlíus, sem er ekki sáttur við ráðuneytið. Mannlegi þátturinn er bara ekki til. Ég er rosalega ósáttur við þetta, en mér finnst bæði að það sé búið að brjóta á mér mannréttindi og traðka á mér," segir hann.

Sigrún Ósk Kristjánsdóttir hefur skoðað búið og brunann sem varð þar árið 2010 í tengslum við þáttaröð sína, Neyðarlínuna. Ítarleg umfjöllun um það verður sýnd á Stöð 2 annan fimmtudag.