Margrét Pála fer til starfa á Tálknafirði

Margrét Pála Ólafsdóttir stofnandi Hjallastefnunnar hefur verið ráðinn skólastjóri Tálknafjarðarskóla, sem er sameinaður leik-, grunn- og tónlistarskóli Tálknafjarðar. Ríflega sjötíu nemendur stunda nám við skólann. Margrét Pála hefur störf um næstu mánaðarmót og mun sinna starfinu að minnsta kosti í eitt ár á meðan skólinn er að aðlagast Hjallastefnunni.

Fram kemur á vef Bæjarins besta að sveitarstjórn Tálknafjarðarhrepps ákvað í maí á þessu ári að taka upp Hjallastefnuna. Það verður því í fyrsta sinn sem Hjallastefnan er innleidd á unglingastigi. Að sögn Eyrúnar Ingibjargar Sigþórsdóttur, mun næsta skólaár fara í að aðlagast breyttum áherslum í þessari nýju stefnu sem verður síðan tekin að fullu inn skólaárið 2013-2014.