Lögreglan tekst á við borgarana á Facebook

Eins og kunnugt er heldur lögreglan úti síðu á Facebook líkt og margar aðrar stofnanir sem vinna í þjónustu við almenning. Borgari nokkur, sem var heldur ósáttur við hraðamælingar lögreglunnar, sendi skeyti í bundnu máli og var kveðjan á þessa leið:





Andskotans löggan í leyni

leggur hjá stóreflis steini

hraðan þeir mæla

með helvítis stæla

og upptækt er ökuskirteini.

Þeir lögreglumenn sem sjá um að halda úti síðunni létu ekki slá sig út af laginu heldur svöruðu um hæl:

Vær'ekki nærri að fara

fetinu hægar og spara

bensín og stress

og komast heim hress

svo löggan þig þurf'ekki að snara.

Ekki ber á öðru en að þessi rimma veki jákvæðar undirtektir því að 289 fésbókarnotendum líkaði við stöðufærslu lögreglunnar um hálfeitt í dag.