Metár hjá Herjólfi

Aldrei hafa jafnmargir ferðast með Herjólfi milli lands og Eyja og þetta árið. Í síðustu ferð gærdagsins fór farþegafjöldi ársins yfir heildarfjölda síðasta árs. Ef fram fer sem horfir mun heildarfjöldi farþega í ár nálgast 300 þúsund.

Á öllu árinu í fyrra voru farþegar Herjólfs 267.448 en eftir gærdaginn er fjöldi þeirra kominn í 267.476 í ár. Nú er 16. október og því má ætla að þónokkrir farþegar fari með bátnum áður en árið er á enda.

Tvennt er það sem helst hefur valdið þessari aukningu að mati starfsfólks Herjólfs. Annars vegar hafa siglingar til Landeyjahafnar gengið mjög vel það sem af er ári vegna veðurs og sjólags. Hins vegar er það jöfn og þétt aukning farþega allt árið.