Fifty Shades of Grey hittir ekki í mark í Frakklandi

Heitasta bók ársins heldur nú innreið sína inn í landið þar sem sadómasókismi var svo gott sem fundinn upp. Bókin virðist hins vegar ekki beinlínis hitta í mark hjá Frökkum þrátt fyrir eitt stærsta prentupplag ársins þar í landi.

Franskir gagnrýnendur Fifty shades of Grey segja bókin leiðinlega, fulla af klisjum og hreint út sagt ómerkilegar bókmenntir. Og sumir gagnrýnendur eru hreinlega móðgaðir „Þessi bók er menningarlegt áfall, árekstur milli Engilsaxneskrar hræsni og ósvikinna sadómasókismaverka okkar Frakka," sagði í blaðinu Les Inrocks.

Málsmetandi Frakkar á sviði sadómasókisma eru því ekki hrifnir af bókinni sem hefur selst í yfir 40 milljón eintökum í 46 löndum og varð sú kilja sem hraðast hefur selst frá upphafi. Frakkar eiga rótgróna bókmenntahefð á sviði sadómasókisma sem þeir stæra sig af og segja að bókin nái enganvegin að fanga heimspekina í sambandi drottnanda og þræls.

Sade var franskur hefðarmaður, en af honum eru orðin sadisti og sadismi dregin. Hann skrifaði mikið af verkum og tvinnaði inn í þau klámfengnar fantasíur. Hann lést árið 1814. Bókin Fifty shades of Grey þykir ekki standast samanburð við verk Sade og önnur frönsk verk um sama efni.

Þrátt fyrir það hefur útgefandi bókarinnar pantað eitt stærsta prentupplag sem heyrst hefur af í Frakklandi í ár. Ein 500 þúsund eintök verða prentuð en að sögn útgefanda er það gert til að mæta eftirspurn vegna fjölda fyrirfram pantana. Því getur vel farið svo að bókin seljist vel þrátt fyrir að gagnrýnendur hafi verið heldur sparsamir á hrósið.

Frá þessu er sagt í breska blaðinu The Guardian í dag.