Vilja efla ferðaþjónustu utan háannatíma

Nokkrir þingmenn hafa lagt fram tillögu til þingsályktunar um nýsköpunarátak til að efla heilsársferðaþjónustu úti í landi. Er þetta í þriðja sinn sem tillagan er lögð fram.

Samkvæmt þingsályktuninni verður atvinnuvega- og nýsköpunarráðherra falið að hefja nýsköpunarátak úti á landi í þríþættum tilgangi: að fjölga erlendum ferðamönnum utan háannatíma, bæta við áfangastöðum á landinu og að álag á ferðamannastaði dreifist betur.

Áætlaður kostnaður við verkefnið er 75 milljónir króna.

Þá verður átakið sjálfstætt samvinnuverkefni Íslandsstofu, Markaðsstofu ferðamála á Norðurlandi og ISAVIA með beinni aðkomu ráðuneyta ferðamála og samgangna.

Nái tillagan fram að ganga og framkvæmd hennar reynist farsæl er hvatt til sambærilegra verkefna fyrir Austurland og Vestfirði.