Ekkert frítt sund fyrir eldri borgara

Eldri borgarar þurfa að öllum líkindum að greiða fyrir aðgang að sundlaugum frá og með áramótum. Í fjárlögum Akureyrarbæjar fyrir næsta ár er tillaga frá íþróttaráði þess efnis að afnema gjaldfrjálsan aðgang fyrir fólk 67 ára og eldri.

Það er fréttamiðillinn Vikudagur sem greinir frá þessu.

Vikudagur hefur eftir Nóa Björnssyni, formanni íþróttaráðs, að tekjur vanti til að reka sundlaugar bæjarins. Árgjald fyrir eldri borgara verður 5.000 krónur en einstakt gjald 150 krónur. Er þetta sama upphæð og börn greiða.

Jóhannes Sigvaldason, formaður Félags aldraðra á Akureyri segir ákvörðunina skjóta skökku við. Í samtali við Vikudag segir Jóhannes að margir eldri borgarar séu ekki aflögufærir og að margtaf því fólki sem hafa nýtt sér fríar sundferðir eigi erfitt með aðra hreyfingu.