Steingrímur tekur þátt í forvali

Steingrímur J. Sigfússon, formaður VG, hefur tilkynnt formanni kjörstjórnar Vinstrihreyfingarinnar - græns framboðs í Norðausturkjördæmi að hann muni taka þátt í forvali flokksins vegna komandi alþingiskosninga.

„Ég býð mig fram til að leiða lista flokksins í kjördæminu eins og ég hef gert frá því kjördæmið varð til með alþingiskosningunum 2003," skrifar Steingrímur.

„Hugur minn stendur til þess að viðhalda í fyrsta lagi þeirri sterku stöðu sem Vinstrihreyfingin - grænt framboð hefur byggt upp, bæði í Norðausturkjördæmi sem og á landsvísu. Í öðru lagi að leggja í dóm kjósenda ótvíræðan árangur ríkisstjórnarinnar við uppbyggingu landsins eftir efnahagshrun nýfrjálshyggjunnar og svara fyrir verk hennar í kosningabaráttunni."

„Með þá reynslu að vopni sem hartnær 30 ára seta á Alþingi og meira og minna samfelld forustustörf í íslenskum stjórnmálum í aldarfjórðung hafa fært mér vonast ég til að geta enn um sinn lagt lóð á vogarskálar baráttunnar fyrir samfélagi jafnaðar og sjálfbærrar þróunar þannig að heldur muni um. "