Sex voru í bílnum sem valt

Sex voru í bílnum sem valt á Akureyjavegi í Landeyjum á þriðja tímanum í nótt. Tvítugur piltur var fluttur með þyrlu Landhelgisgæslunnar til Reykjavíkur og er hann nú undir eftirliti lækna á slysadeild Landspítalans.

Sveinn Kristján Rúnarsson, yfirlögregluþjónn hjá lögreglunni á Hvolsvelli, segir að hinir fimm farþegar bílsins hafi verið fluttir á Heilbrigðisstofnun Suðurlands á Selfossi. Meiðsl þeirra eru talin minniháttar.

Sveinn segir að slysið hafi átt sér stað rétt fyrir neðan Njálsbúð og hópurinn hafi verið að koma af dansleik þar. Grunur leikur á að bíllinn hafi komið á of miklum hraða inn í beygju að einbreiðri brú og hafnað á brúarstólpa. Sveinn tekur fram að rannsókn standi enn yfir og að mörgum spurningum sé enn ósvarað.

Þá leikur ekki grunur á að ökumaður hafi verið undir áhrifum áfengis.